Mamina... N'Atenes, la xunta ciudadana formábenla los miles d'homes ciudadanos -non les muyeres o los esclavos- cola regla del Ho boulomenos: que fale quien quiera falar. Falaben, y depués votaben. Nes aldees asturianes, les poques decenes de vecinos aconceyaben pa tratar en comuña l'asuntu. Falaben y acordaben, direutamente.
Pela contra, Platón decatóse que la xente sabio, gobernada pola razón, tenía más posibilidaes de tomar les decisiones acertaes que la xente non-sabio, somorguiao nel mundu de lo sensible. El peligru d'esta verdá ye l'usu que-y dan los dictadores y los sistemes paternalistes: nun toes les persones valen lo mesmo; unes valen pa mandar, otres pa obedecer.
Equí, tenemos una mecigaya. Representación y mayoría. Ye claro qu'un mundu fechu con eses blimes obliga a toa minoría social débil a sufrir. Seya cual seya la minoría y tea onde la llende cola que dixebres a los más de los menos. Ye claro, pero por claro que seya, nun vien mal recordalo nesta dómina de irreflexón xeneral pa contra la organización política.
L'enguedeyu mental d'esa rapaza da la risa. Pero nun ye más que'l frutu d'una sociedá fecha pa que'l pueblu yá nun sepa lo suficiente como pa gobernase a sigo mesmu. Y ehí ta la moza, en metá del ermu de conformismulandia y tovía con ganes facer por ameyorar les coses.
Cuidáu nun mos faigan lo mesmo qu'a ella. Equí, les minoríes nun puen conformase -nun deben- con votar. Nun puen conformase con nun saber. Hai que ser sabio -nun queda otra- y puxar solos y en comuña. Lleendo y falando. Iguando'l cartelu de delantre casa, presentando la Memoria de Práctiques. Denunciando, espatuxando, lluchando.
Ensin parar.
Yo opino que cuantes mas oportunidaes se tengan de partcipar activa y directamente nes decisiones que nos afecten (el tradicional conceyu abieru, por exemplu) más nos obligamos a ser, anque seya una migayina minúscula, más sabios, magar heba xente que nunca va ser a pasar del simple esbabaye. Y, pola contra, cuanto más deleguemos y más llargu seya'l plazu de delegación d'eses decisiones, más nos atochecemos. Pienso que la sociedá empobina hacia una inorancia cada vez mayor de la política, el sindicalismu, los derechos y llibertaes ciudadanos... Si los romanos afitaron el "pan y circu" tal paez qu'anguaño afítase el "fútbol y programes del corazón". Lo peor ye que too ello pudiere desembocar nun populista salvador (dictador, probablemente) qu'embizque a la sociedá colos sos proyectos d'igua xeneral y definitiva de los problemes.
ReplyDeleteUn saludu.
Enantes un saludu por volver ;). Lo segundo toi d'alcuerdo con El Xanu anguaño tenemos afitao y perafitao "fútbol y programes del corazón". A naide-y paeció mal la vergoñosa y escomanada cantidá de millones que se-y pagó al faltosu esi de Cristiano Ronaldo por "xugar a la pelota". Mentes les empreses medies xebren y cayen. Los oberos al paru. Y cuando toque, a siguir votando al mesmu.
ReplyDeleteN'Asturies hemos de desempolvisar los Conceyos Abiertos. Tenemos que camudar esti percal, cola pallabra, dándomos sonadía na nuesa nación, cola nuesa xente. Facelos desconsonar. A títulu personal colo collacios, vecinos y compañeros; y los partíos que se faen llamar nacionalistes asturianos han axixar esi alitar de conciencia ciudadana.
Con toles barbaridaes feches pol gobiernín y asoleyaes en milenta sitios, les denuncies y toles osties que tán llevando nos caberos meses nun pue ser que sigan teniedo'l mesmu númberu de simpatizantes. A esa xente hai de llegar, con un discursu seriu y combincente.
Pd: esi dictador yo veolu a nivel estatal n'Esperanza Aguirre. Equí vuélvimos Cascos...
Gracies polos comentarios :)
ReplyDeleteLa fórmula del Conceyu Abiertu lo que mos recuerda ye que podemos -tenemos- que participar de mou activu en toles estayes de la vida social -tamién nes económiques y polítiques- y que podemos facelo ensin caleyar el camín de la representación zarrada, que ta fechu pa que la to voz y el to votu apaezan cada cuatro años a cambiu de nun apaecer durante'l restu d'esos años. D'ehí al bipartidismu futbolísticu y al amoriamientu colectivu d'una sociedá manguana que ri y suaña hasta cuando-y tán dando de cibiellazos con crisis económiques, llaborales y civiles que nun entamó. Con esi cuchu la dictadura medra que se mata. Nesta Asturies con síndrome d'Estocolmu sabémoslo bien. Y cuidáu, qu'ehí vien UPyD.
Pero, con too y con ello, lo que digo ye que tamos avezaos a posar munchu pesu y importancia nos partíos políticos y nes eleiciones, cuando en realidá hai munches otres maneres d'actuar. Cualquiera que tea n'asociaciones, de tou tipu, sabe que per esi camín pues algamar y camudar abondes coses.
Pero hasta como individuos, tando solos, ye importante nun quedar quietos. Entamando, por exemplu, por entafarrar esi cartelu con toponimia non-oficial que tenemos xusto delantre casa. Porque si nun garres esa responsabilidá tu, quién lo va facer.