Ayeri celebróse en Ciañu la segunda xunta de blogueros y blogueres en llingua asturiana, una prestosa oportunidá pa falar sobre les posibilidaes y futuru d'esti mediu, amás de pone-yos cara y voz —non ensin delles sorpreses— a munchos de los alcuños que remanamos na rede.Fueron perbones les charres de David Guardado sobre la prehistoria del internet asturianu —nel que la nuestra llingua tuvo presente yá dende'l momentu 0—; l'interesante análisis que fizo Poli Mencía del momentu actual de densenrollu del asturianu nes comunidaes online, dende la comparanza con otres comunidaes llingüístiques vecines; les posibilidaes que mos aprendió Mikel de González y González y Softastur en Ximiélgame, proyectu que promete ser el nuevu gran reblagón que dea la nuestra rede al axuntar toles formes de comunicación n'internet nun prestosu entornu comunitariu; y la comparativa qu'apurrió Marcos de TaPaPonga d'ente les plataformes blogueres esistentes, que fai que mos planteguemos un cambéu futuru.
Paezme ilusionante la capacidá de movilización y visibilización qu'amuesa'l nuestru mundín dacuando, pero mas tovía si esta surde, como'l II Sidra&Blogues, d'un mou desinteresáu, autónomu y solidariu. La mio norabona y l'agradecimientu mas candial a la perbona organización de Ricardo Candás (La Esfoyaza) y Tin Seoane (Trayasgaya); a Eloy Antuña, el Conceyu de Llangréu y los responsables del Serviciu de Normalización Llingüística na Casa los Alberti de Ciañu; al coleutivu Softastur y LoCo Team d'Asturies; a Xareos! Xestión Cultural y los responsables de la prestosa revista Formientu; a los músicos de la Escuela de Música Tradicional de la A. P. A. del Conservatoriu Valle del Nalón; a El Xanu'l Caborniu y González y González polos sos permerecíos premios; a los blogueros y blogueres qu'ellí aconceyemos, y a les persones qu'apurrieron un votu a esti blogue. Aceutémoslu con humildá —sabiendo que ye un brinde y una celebración que la comunidá bloguera se fai a sigo mesma— y con enfotu pa siguir puxando pola espresión na nuestra llingua na rede.
De les charres d'en chigre quedámonos cola propuesta d'un futuru Premiu al Meyor Trolléu del Añu (toos sabemos quién lu diba ganar esti), col esmolecimientu compartíu sobre la llibertá d'espresión na rede y les nueves llexislaciones coercitives, cola anéudota xenial que mos contó David Guardado sobre una radio n'alemán nun pueblu de la Cuenca (afálote a escribíla de mou lliterariu dalgún día, David) y col gustu d'afayamos ente collacios, dalgunos de vieyo y munchos de nuevo.
Si dalgo rescampla nun día asina, ye qu'en 2010 l'asturianu vive na rede cola mesma naturalidá qu'esiste en cualquier estaya de la nuestra sociedá: con puxu, calidá, arguyu y futuru. Que siga diendo a más. ¡Vémonos nos prósimos Sidra&Blogues!
Pola parte que me toca, gracies polos tos comentarios. Foi bien prestoso, camiento, pa toos y toles que mos acercamos. Encantáu de conocete en persona y tranquilu, qu'hai más dies que llonganices, asina que tiempu habrá p'alcontranos y charrar. Otra vuelta norabona pol premiu. Y como bien dices tu, albidro que lo d'ayeri foi un homenaxe de tola xente bloguero, pa tola xente bloguero. Un saludu bien candial.
ReplyDeletePerbien resumío :D ¡Yes un crack! :)
ReplyDelete¡Felicidaes pol to 2ᵁ puestu! Que cola calidá algamada por esta blogosfera tien abondu méritu :D
Pa quien quiera ver la presentación que fice, equí ta http://acurti.es/Bta La verdá que me ponen mui nerviosu eses coses y dexé un montón d'anecdotes :( Pa otra vegada será meyor primero la sidre y lluéu la charra xD ḥaḥaḥa
Estes 'pequeñes coses' son les que faen que pague la pena tener un blogue nuna llingua tan estrozada y sapozada como la nuesa.
ReplyDeleteComo yá dixi perhí foi un gran alcuentru pa pone-y cara a los blogues, conocemos personalmente y charrar ente nós. Un alcuentru que mom bien dices foi "d'un mou desinteresáu, autónomu y solidariu".
Un daludu candial!
Una descripción perfecta de lo acontecío esti sábadu en Ciañu. Nun fai falta añadir nin una pallabra más. Alégrome de conocete en persona y seguro que vamos tener oportunidá de siguir charrando en prósimos alcuentros de blogueros. Yá sabes que soi siguidor fiel y puntual d'esti gran blogue.
ReplyDelete¡Saludos!.
La charra tuvo prestosa por demás, marquinos. Gracies por poner el resume tamién nel vuestru blogue :)
ReplyDeleteComo bien dicís, tuvo bien guapa la xunta pa salir del ñeru, aprender y aldericar. Hai que lo repetir. Y a ver si la prósima vez saludes, Pelayu! ;)
Bono, ye que tabes charrando con otres persones y, por nun molestar nun dixi nada. Pa otra (qu'aspero que se faiga) saludaréte :-)
ReplyDeleteUn saludu!
Cuántes coses entamaríen d'esti mou...Prestoso ye saber que la rede ast alenda y ta viva y, perprestoso, xuncida.
ReplyDeleteYe verdá Repunante. A ver si t'apuntes pa la prósima ;)
ReplyDeleteVeritas, tienes un regalucu nel mio blogue que yes llibre de pasar a recoyer (si quies, porque alviértote que ye un regalu con trampa).
ReplyDeleteUn saludu candial